Туристите, деловните патници и верските поклоници се најдоа во хотели и терминали без информации кога летовите повторно ќе започнат. Владите им порачаа на своите граѓани да останат на безбедно додека ситуацијата не се стабилизира.

Аеродромите во Дубаи, Абу Даби и Доха – меѓу најважните светски јазли – останаа затворени по иранските напади. „Емиратес“ и „Етихад“ привремено ги суспендираа летовите, а „Катар ервејс“ најави дека прекините можат да продолжат и во следните денови. Стотици авиони се распрснати по аеродромите ширум светот, без можност за враќање во матичните бази.

Патници „заробени“ во зоната на судир

Најмалку 58.000 индонезиски поклоници останаа блокирани во Саудиска Арабија, а околу 30.000 германски туристи беа задржани на крстосувачи и во хотели низ регионот. Во Велика Британија повеќе од 100.000 граѓани пријавиле престој во зоната на судир, додека Азија беше погодена од откажување летови кон Заливот – само на Бали беа откажани 15 летови, што засегна повеќе од три илјади патници.

Владите на низа држави се обидуваат да организираат повратни летови или алтернативни рути, но многумина предупредуваат дека евакуација не е можна додека воздушниот простор е затворен.

Удар врз глобалниот сообраќај

Воздушните коридори на Блискиот Исток се меѓу најпрометните во светот, а ненадејното прекинување на сообраќајот нанесе силен удар врз компании како „Емиратес“, „Катар ервејс“ и „Етихад“. Дубаи, кој минатата година беше најпрометниот меѓународен аеродром во светот, соопшти за „помали оштетувања“ на терминалите и четворица повредени.

Властите на ОАЕ соопштија дека ги покриваат трошоците за престој на патниците погодени од кризата, а досега се згрижени повеќе од 20 илјади луѓе.