Моделот од почетокот на 1970-тите сега се враќа во модерна интерпретација, но станува збор за проект резервиран за вистински колекционери. Холандската компанија „Autoforma“ планира да произведува само пет примероци годишно, а почетната цена ќе изнесува околу 300.000 евра.

Зад проектот стои дизајнерот Нилс ван Роиј, познат по ексклузивни "coachbuild" преработки. „Autoforma“ сака да покаже дека светот на врвните ретомод автомобили не е резервиран само за најпознатите имиња како „Singer“. Резултатот е нова интерпретација на модел кој и денес многумина го сметаат за едно од најубавите „Volvo“ возила во историјата.

Класична форма, модерни детали

Оригиналниот „P1800“ потекнува од 1960-тите, но неговиот дизајн и денес изгледа елегантно и безвременски. "Shooting Brake" верзијата, позната како „P1800ES“, отсекогаш била посебна поради големата стаклена задна врата и складните пропорции. „Autoforma“ го задржа тој дизајн, но суптилно го модернизира.

Каросеријата е проширена, што на автомобилот му дава поагресивен и постабилен став на патот. Кровот е редизајниран и добива интегриран спојлер, додека предниот дел е освежен со црни детали, нова маска и LED светла. Црните елементи се протегаат и на ретровизорите и рамките на прозорците, но купувачите што сакаат покласичен изглед ќе можат да изберат хромирани детали.

Назад останува препознатливото големо стакло што се подигнува и овозможува пристап до багажникот, но сега со модерни LED задни светла и новоразвиени тркала кои дополнително го нагласуваат современиот карактер.