Португалската галија, позната по својата силна токсичност и долги пипки, често може да се забележи како плови на површината на морето. Се вбројува меѓу најотровните животни во светот, а нејзиното тело може да достигне должина до 30 сантиметри.

Предупредувањето го издаде локалната власт во Велс, откако капачи пријавиле дека виделе неколку единки на една од плажите. Полицијата и спасувачките екипи го обезбедија делот од крајбрежјето, а на граѓаните им беше препорачано да не им се приближуваат и да не ги допираат овие суштества, пренесува „Daily Mail“.

Колонии што ги носат струите

Инцидентот се случил во утринските часови, кога спасувачки тим забележал неколку колонии на португалска галија, кои биле донесени до брегот од ветерот и морските струи. Иако точниот број не е објавен, властите нагласиле дека ситуацијата е невообичаено сериозна за тоа подрачје.

Експертите објаснуваат дека причината за појавата на овие организми во водите на Обединетото Кралство може да биде поместувањето на морските струи и засилените западни ветрови. Португалската галија обично живее во топлите води на тропските мориња, но поради климатските промени и промените во океанските струи, сè почесто се среќава и во умерени зони.

Иако на прв поглед изгледа како медуза, научниците предупредуваат дека тоа не е медуза, туку колонија од повеќе организми кои пловат благодарение на воздушна вреќа исполнета со гас. Долгите пипки испуштаат силен отров со кој ги лови своите жртви – најчесто мали риби.

Опасна дури и по смртта

Важно е да се знае дека и мртвата португалска галија е опасна. Пипките можат да останат функционални и по смртта или сушењето на брегот, па дури и случаен контакт може да предизвика тешки последици.

Во случај на убод, лекарите препорачуваат:

• погоденото место веднаш да се исплакне со морска вода (не со свежа вода),

• пипките внимателно да се отстранат со неинвазивен предмет (на пример со пластична картичка),

• засегнатото место да се потопи во топла вода најмалку 30 минути,

и веднаш да се побара медицинска помош.

Зголемено внимание за капачите и сопствениците на миленици

За капачите и шетачите на кучиња, ова значи зголемен степен на претпазливост. Препораката е да се избегнуваат плажите каде што се забележани примероци и секое ново појавување да се пријави на локалните служби.

Спасувачките тимови постојано ја следат ситуацијата и дел од крајбрежјето е привремено означен како ризична зона.

Иако смртните случаи поради убод од португалска галија се исклучително ретки, последиците можат да вклучуваат силни болки, плускавци на кожата, алергиски реакции, па дури и срцеви проблеми кај почувствителни лица.

Затоа властите предупредуваат јавноста да не ја потценува ситуацијата и да се придржува до сите безбедносни упатства.