На 14 октомври оваа година доаѓа клучна пресвртница за милиони корисници на „Windows 10“ ширум светот.

„Microsoft“ ќе ја прекине службената поддршка за овој оперативен систем (ОС), а интернетот веќе е преплавен со неточни толкувања. Еве ги петте најчести митови — и објаснувањето што навистина стои зад нив.

Мит 1: „Windows 10“ целосно ќе престане да работи

Спротивно на алармантните тврдења, „Windows 10“ нема да престане да функционира на денот кога завршува поддршката.

Крајот на животниот циклус само значи дека „Microsoft“ повеќе нема да објавува безбедносни ажурирања.

Корисниците можат да продолжат да ги користат своите компјутери како и досега, но без редовни надградби и заштита.

Сепак, за првпат „Microsoft“ нуди продолжена безбедносна поддршка, што ќе им овозможи на многумина безбедно користење на „Windows 10“ и по официјалниот рок.

Мит 2: Користењето на „Windows“ без ажурирања е безбедно

Некои тврдат дека внимателните корисници нема од што да се грижат.

Но, иако внимателно пребарување на интернет и добар антивирусен софтвер помагаат, пропустите во „Windows 10“ со текот на времето ќе се натрупуваат, оставајќи го системот ранлив на напади и безбедносни пробои.

Во реалноста, ваквиот пристап не е безбеден, особено кога „Microsoft“ нуди една година бесплатни безбедносни надградби за сите овластени корисници на „Windows 10“.

Мит 3: Продолжената поддршка бара синхронизација на сите лични податоци

Кружи мит дека за да се добие една година бесплатни безбедносни надградби, корисниците мора да ги синхронизираат своите лични податоци со „Microsoft“.

Вистината е поинаква: надвор од Европа, се синхронизираат само поставките на компјутерот преку „OneDrive“.

За корисниците од Европската економска зона ова не е потребно, благодарение на Законот за дигитални пазари на ЕУ, кој ги ограничува овие обврски.

Мит 4: Не е потребна „Microsoft“ сметка

Без оглед на прашањето за синхронизацијата, „Microsoft“ сметка сепак е задолжителна за добивање на бесплатните безбедносни надградби.

Компанијата појасни дека сите кои користат продолжена поддршка мора континуирано да бидат најавени со својата „Microsoft“ сметка, за да се спречи злоупотреба или заобиколување на правилата.

Мит 5: Хардверските барања за „Windows 11“ спречуваат надградба

Построгите хардверски барања на „Windows 11“ — вклучувајќи го и чипот TPM 2.0, кој служи за безбедно складирање на шифрирачки клучеви и заштита од малициозен софтвер — навистина спречуваат надградба кај некои постари уреди.

Но, поновите компјутери обично се компатибилни, само треба TPM 2.0 да се активира во BIOS-от.

Многу корисници погрешно веруваат дека нивните уреди не го поддржуваат „Windows 11“, и така пропуштаат можност за бесплатна надградба.

Затоа, пред да се откаже од идејата, проверете дали TPM 2.0 е вклучен во BIOS-от.

Со разоткривањето на овие митови, корисниците можат информирано да одлучат како ќе го користат својот систем по крајот на поддршката за „Windows 10“ — балансирајќи меѓу континуитет, безбедност и подготвеност за премин на „Windows 11“.