Откако американскиот претседател Доналд Трамп вчера во Белата куќа потврди дека е „подготвен за втората фаза од санкциите врз Русија“ поради војната во Украина, денеска стигна одговорот на Кремљ.
На прашањето за коментарите на Трамп, Кремљ рече дека Европа и Украина прават сè што можат за да ги привлечат САД во својата орбита. Тие додадоа дека никакви санкции никогаш нема да можат да ја принудат Русија да го промени својот став.
Трамп изрази растечко незадоволство од Москва во последните недели по средбата со Владимир Путин минатиот месец, но досега се воздржа од преземање построги мерки.
Најновите изјави укажуваат на зацврстување на ставот, иако американскиот претседател не прецизираше дали е донесена конечна одлука или што би вклучувала „втората фаза“ од санкциите. На прашањето на новинарите во Белата куќа дали е подготвен за втора фаза од санкциите против Русија, Трамп одговори: „Да, подготвен сум“.
Трамп рече дека планира наскоро да разговара со рускиот претседател Владимир Путин. „Многу наскоро. Во следните неколку дена. Гледајте, ќе завршиме со тоа. Ситуацијата меѓу Русија и Украина. Ќе завршиме со тоа“, рече тој.
Трамп, исто така, рече дека „не е воодушевен“ од најновиот масовен напад на Русија, кој оштети владина зграда во центарот на Киев. „Не сум воодушевен од она што се случува таму. Верувам дека ќе го завршиме тоа. Но, не сум задоволен од нив. Не сум задоволен од ништо што има врска со таа војна“, рече тој.
Трамп нагласи дека „одредени европски лидери“ ќе ја посетат Белата куќа во следните два дена за да разговараат за мировно решение, иако не спомена имиња или детали.
