Забележани се над 20 пријави за паднати дрвја на улиците и во дворовите поради невремето, но според првичните информации нема повредени лица, изјави портпаролката на Полициската управа во Ќустендил, Катја Табачка, за Бугарското национално радио.

Бугарија без струја, жителите повикани да останат во домовите

Таа додаде дека пожар избувнал меѓу селата Јабалково и Коњаво, а на терен се испратени повеќе противпожарни екипи на кои гаснењето им е отежнато од силниот ветер.

Регионалната полициска управа во Ќустендил соопшти дека имало повеќе пријави за пожари и дека екипите се испратени насекаде, но дека се гасат приоритетно.

„Ударите на ветерот откорнаа дрво кое падна врз покрив на куќа. Исто така, имаме 7-8 автомобили врз кои паднаа дрвја“, додаде градоначалникот на Ќустендил, Огњан Атанасов.

Паднатите дрвја ги блокираа патиштата кон околните села, а снабдувањето со електрична енергија е прекинато на многу места. Атанасов ги повика жителите да останат во своите домови.

Тиват: Тешко оштетени два хидроавиони

Силното невреме кое синоќа околу 23 часот го зафати Тиват, предизвика значителна штета на два авиони на платформата за генерална авијација на Аеродромот Тиват.

Станува збор за два т.н. ултралесни хидроавиони кои беа учесници на 5. Меѓународна регата на хидроавиони „Montadria“.

Нивната мала тежина, бидејќи припаѓаат на т.н. ултралесна категорија спортски летала, придонесе силниот ветер буквално да ги подигне од платформата на која беа паркирани, а потоа повторно да ги „тресне“ на земја.

Запалени метеоаларми во Романија

Националната метеоролошка управа на Романија соопшти дека во неделата биле издадени повеќе портокалови и жолти метеоаларми за бури, град и силни ветрови.

Портокаловиот метеоаларм за силни дождови и бури беше на сила во неделата, 31 август, од 12:00 до 21:00 часот, на северозападот на земјата.

Во кратки временски интервали или со акумулација, количината на врнежи достигнала 40 – 50 л/м2, а на изолирани места и над 60 л/м2, прецизираат метеоролозите.

Две други предупредувања за лошо време важат од неделата навечер до понеделник, главно на северот, но и во централниот дел од земјата. Портокаловиот метеоаларм за силни дождови и бури е активен и за понеделник.