Украина во 1994 година го потпиша Будимпештанскиот меморандум, со кој се согласи да се откаже од својот нуклеарен арсенал наследен од Советскиот Сојуз, во замена за безбедносни гаранции од Русија и други големи сили. „Sky News“ го пронајде Јуриј Костенко, човекот кој бил дел од украинската преговарачка делегација, и кој денес е загрижен дека сојузниците на Киев можат да направат иста погрешна проценка како и тој пред повеќе од три децении.
Украина плати висока цена
Според одредбите од Будимпештанскиот меморандум, Украина се откажа од своето нуклеарно оружје во замена за гаранции за својата територијална целост. Но, како што вели Костенко, Украинците и денес ја плаќаат цената на таа одлука.
Владимир Путин го прекрши договорот најпрво со анексијата на Крим во 2014 година, а потоа и со целосната инвазија врз Украина во 2022 година.
„Русија сака да ја окупира цела Украина“
Новинар на „Sky News“ се сретнал со Јуриј Костенко во Киев. Тој вели дека постои сериозна опасност светот повторно да поверува во празните ветувања на Путин – нешто за кое, наводно, денес е подготвен и Доналд Трамп.
„Моето практично искуство од повеќе од 30 години ми кажува дека Русија никогаш не ги запира своите планови за агресија и за окупација на цела Украина. Ако Трамп навистина му верува на Путин, тоа е огромна грешка“, предупредува Костенко.
Самитот на Алјаска и поинаков пат
Во пресрет на самитот на Алјаска, западните сојузници се согласија дека најдобриот пат до мир е Путин да биде принуден да ја прекине инвазијата преку остри санкции кон трговијата со нафта.
Сепак, по самитот, Трамп се повлече од идејата за прекин на огнот и ја отстрани заканата за дополнителни санкции, водејќи ги сојузниците по, како што го опишува „Sky News“, „поинаков и многу понеизвесен пат“.
