Виктор Ѓекереш ќе си ја оствари желбата да настапува во Премиер лигата и денеска Спортинг Лисабон му дозволил да замине во Англија за да ги помине вообичаените лекарски прегледи.
Шведскиот репрезентативец ќе стане нов член на Арсенал и сигурно ќе предизвика еуфорија кај фановите на лондонскиот клуб, кои долго се надеваа на реализација на трансферот на голгетерот.
27-годишниот фудбалер добил зелено светло за преселба откако двата клуба постигнале договор за трансферот, а новинарот кој прв ја објави информацијата (Дејвид Орнстајн) најавува дека прегледите се закажани за утре.
Трансфер сумата не е потврдена, но сигурно ќе биде најмалку 70 милиони евра, а новинарот тврди дека Ѓекереш решил да го носи дресот со број 14, кој има посебно значење поради клупската легенда Тјери Анри.
