По повод Меѓународниот ден на детето, компанијата "Kaspersky" го објави својот годишен извештај за интересите на децата во дигиталниот свет. Анализата која го опфаќа периодот од мај 2024 до април 2025 година открива сè поголем интерес за чет-ботови базирани на вештачка интелигенција, вирален пораст на италијански „брејнрот“ мимови како „tralalero tralala“, како и сè посилна привлечност кон играта "Sprunki" — ритмичка игра што комбинира музика и движење. "YouTube" останува најпопуларна апликација меѓу децата на глобално ниво, додека "WhatsApp" го надмина "TikTok" и се искачи на второто место.
Најновите истражувања покажуваат дека децата на возраст од 8 до 10 години просечно поминуваат околу шест часа дневно пред екрани, додека децата од 11 до 14 години дури и до девет часа. Со оглед на тоа што значаен дел од нивниот живот се одвива онлајн, сè поважно станува родителите да разберат што им го привлекува вниманието на нивните деца во дигиталниот простор — што пребаруваат, кои платформи ги користат и какви трендови влијаат на нивните интереси и однесување.
Секоја година новите дигитални трендови го обликуваат начинот на кој децата го истражуваат светот. Во годинешниот извештај, "Kaspersky" забележа нагло зголемен интерес за алатки од областа на вештачката интелигенција. Додека во периодот 2023 – 2024 ниту една "AI" апликација не се најде меѓу 20-те најкористени, "Character. AI" годинава влезе на таа листа, што покажува дека децата не се само љубопитни кога станува збор за вештачката интелигенција — туку активно ја вклучуваат во својот дигитален живот. Над 7,5% од сите пребарувања се однесувале на "AI" чет-ботови. Оваа платформа им овозможува на корисниците да креираат или комуницираат со ботови кои имитираат измислени или реални личности. Тоа е значителен пораст во однос на претходната година, кога "AI" пребарувањата сочинувале само 3,19% од вкупните.
Сепак, не сите интеракции со чет-ботови се без ризик. Некои од нив можат да ги изложат децата на емоционално интензивна содржина, дезинформации или теми што не се соодветни за нивната возраст — особено ако ботовите се создадени или модифицирани од други корисници. Бидејќи ваквите платформи често се потпираат на содржина генерирана од корисници и имаат слаба модерација, клучно е родителите отворено да разговараат со децата за тоа како ги користат "AI" алатките и да активираат апликации за дигитално родителство што ќе им помогнат на семејствата да бидат информирани, вклучени и заштитени.
Иако мимовите годинава сочинуваат мал дел од пребарувањата, тие сепак откриваат уште една димензија на детската дигитална култура. Многу од најпопуларните мимови припаѓаат на т.н. „брејнрот“ — вид на апсурден, намерно хаотичен хумор што се шири преку кратки видеа. Меѓу најпребаруваните биле италијанската фраза „tralalero tralala“ и музичкиот мим „tung tung tung sahur“.
Меѓу новитетите што го привлекоа вниманието на аналитичарите се истакнува и "Sprunki" — ритмичка онлајн игра што комбинира музика и визуелна интеракција. Играта бара од играчите да го погодат ритамот во склад со брзата музика, што го прави искуството и имерзивно и физички ангажирачко. Нејзината светла, цртана графика и заразен гејмплеј ја прават сè попопуларна меѓу помладата публика.
