Познатиот холивудски актер Вал Килмер, кој почина завчера, бил следбеник на контроверзната христијанска научна црква, која верува дека болестите не се реални и дека можат да се излечат само со молитва.
Тој сметал дека неговиот рак е само „сугестија на умот“ и често негирал дека воопшто ја има оваа болест.
Во 2014 година, кога му беше дијагностициран рак на грлото, Килмер одбил лекарска помош, верувајќи дека молитвата и духовното исцелување ќе бидат доволни за негово излекување.
Тој ги отфрлил традиционалните медицински терапии, верувајќи дека неговата вера ќе го излечи. Единствено по упорноста на неговите најблиски, особено на неговите деца, тој се согласи да се подложи на операција, хемотерапија и зрачење. Сепак, и покрај тоа, тој и понатаму верувал дека молитвата е клучна за неговото закрепнување.
Килмер почина на 65-годишна возраст од воспаление на белите дробови, што беше поврзано со неговите долгогодишни здравствени проблеми.
Слични трагедии се случувале и во други случаи на следбеници на христијанската научна црква, која долго време беше критикувана за негирање медицинска нега, особено кај децата, и за ширење епидемии поради одбивање на вакцинација.
Христијанската научна црква, која беше основана во 1879 година, сè уште има голем број следбеници, меѓу кои се и познати личности како Мерлин Монро и Елизабет Тејлор. Иако на многумина им е позната како религија, експертите ја сметаат за култ кој потекнува од мистичната духовност и се спротивставува на модерната медицина.
