Иако "Ioniq 6" е присутен веќе три години, сè уште изгледа како автомобил од иднината. Независно од својот авангарден дизајн, "Hyundai" реши да го рестилизира овој електричен седан во средината на неговиот животен циклус.

За набљудувачите, и натаму е подеднакво поларизирачки, можеби дури и повеќе, поради новите поделени предни светла.

Преуреден дизајн и агресивен "N Line" пакет

Редизајнираната предна маска сега има одвоена горна лента со дневни светла, додека главните фарови се „скриени“ во црниот дел на браникот.

Освежениот "Ioniq 6" пристигнува и со "N Line" пакет, кој носи поагресивни браници и двобојна завршница.

Задниот дел е значително почист поради отстранувањето на масивниот двоен спојлер, кој е заменет со поефикасен аеродинамичен елемент.

Црните акценти и поизразените браници го прават моделот посличен на неговиот кросовер „брат“ – "Ioniq 5 N Line".

На некои од официјалните фотографии може да се забележи и спортскиот "Ioniq 6 N", кој ќе биде официјално претставен во јули. Веќе сега е јасно дека ќе има импозантен заден спојлер.

Повеќе физички копчиња и поквалитетен ентериер

"Hyundai" вети дека ќе ги задржи физичките копчиња, откако сфати дека купувачите повеќе ги преферираат во однос на контролите на екранот.

Со тоа на ум, не изненадува што моделот "Ioniq 6" за 2026 година има уште повеќе физички тастери во споредба со претходната верзија.

Централната конзола е редизајнирана за да се додадат повеќе класични контроли лево од држачот за чаши и подлогата за безжично полнење.

Кога "Ioniq 5" беше освежен минатата година, исто така доби повеќе класични команди.

На фотографиите не може целосно да се види командната табла, но посебните контроли за клима-уредот се сè уште присутни.

Прикажаниот модел е корејската верзија, каде камерите наместо странични ретровизори се легални, па затоа на аглите на таблата можат да се забележат дополнителни екрани.

Дополнително, се истакнува новиот трикрак волан, а "Hyundai" ветува поквалитетни материјали во ентериерот.

Освежените "Ioniq 6" и "Ioniq 6 N" беа претставени на саемот во Сеул, но без објавени технички детали.

Логично е да се претпостави дека овој седан ќе ги преземе подобрувањата видени кај "Ioniq 5", вклучително и унапредувањата наменети за спортската "N" верзија.