Сепак, дури и најголемите ѕвезди имаат моменти кога се навраќаат на минатото со доза на жалење, а Килмер не беше исклучок. Иако неговата филмографија е полна со квалитет, самиот актер признал дека жали што порано во кариерата не изградил јасна професионална личност – препознатлив идентитет по кој публиката би го поврзала со одреден тип на улога.

Во интервју за „Vanity Fair“, Килмер во една прилика изјавил: „Всушност жалам што уште порано не ја создадов својата персона, како што направија моите мудри современици“. Тој тогаш се осврнал на колегите како Џони Деп, Николас Кејџ и Шон Пен, кои „развиле прилично цврст идентитет“. „Кога ќе помислите на нив, веднаш ви паѓа на ум многу специфичен тип на карактер“, објаснил Килмер.

Споредувајќи се со Том Хенкс, кој јавноста го доживува како „американска добричина“, Килмер рекол дека Хенкс изгледа како некој кој внимателно ги одбрал своите проекти и изградил имиџ цврсто поврзан со американската кинематографија. „Не е случајно што остава впечаток на преданост кон Америка и одреден вид на американски дух“, рекол Килмер.

Семејството му било приоритет

Од друга страна, Килмер изјавил дека во раните фази од кариерата едноставно не го интересирало такво нешто. Признал дека глумата не му била приоритет и дека често претпочитал да се занимава со личните интереси и семејството. „Никогаш не ми беше удобно на јавни настани, не сакав да се „продавам“ себеси како производ“, искрено рекол актерот.

Зборувајќи за неговите професионални одлуки, Килмер изјавил дека одбил соработка со голем број големи режисери поради семејни обврски. „Не одбив само пет големи режисери, туку десет. Сето тоа затоа што сакав да бидам одговорен кон семејство и мојот брак. Не можам да бидам одговорен родител ако сум дома само три или четири месеци годишно“ рекол Вал.

И покрај овие одлуки, Килмер не го загубил местото меѓу најпрепознатливите холивудски актери. Можеби не го постигнал митолошкиот статус на Том Хенкс или Џони Деп, но тешко е да се оспори неговиот придонес во американската кинематографија.