Дури 61 прекршок поради пречекорување на брзината доведе до огромна казна од 38.250 евра.
Радарска камера во тунелот Флојфјел, во регионот Берген, Норвешка, снимила ист автомобил како ја пречекорува брзината дури 61 пат во рок од само четири месеци.
Кога властите го идентификувале возачот, се покажало дека станува збор за државјанин на Романија, кој живее во Норвешка од минатата есен.
Вкупната казна за прекршоците изнесува огромни 38.250 евра!
Највисоката брзина што ја забележала радарската камера во тој период била 136 км/ч, што е значително над дозволената граница. Откако казните продолжиле да се акумулираат, полицијата го идентификувала возачот и го привела пред правдата.
За време на судењето, Романецот ја признал вината, но се обидел да се оправда со зборовите:
„Во Романија возиме поинаку. Ограничувањата на брзината се различни од оние во Норвешка. Не беше од лоша намера што премногу ја притискав педалата за гас, туку од навика. Сепак, не се сомневам дека радарот точно ја измерил брзината.“
Оваа одбрана не му помогнала. Судот го осудил на 30 дена затвор, без можност за условна казна или одложување.
Дополнително, затворската казна ја заменува паричната, што значи дека нема да треба да ја плати казната од 38.250 евра.
Освен тоа, му е забрането управување со возила на јавни патишта во Норвешка во наредните 17 месеци. Така, дури и по излегувањето од затвор, долго време нема да може да вози.
