"Microlino" го прикажа концептот "Spiaggina" на Саемот за автомобили во Париз во 2022 година, а сега тие се вратија на истата локација за да го претстават серискиот модел.
Се рекламира како ексклузивен летен автомобил кој црпи инспирација од моделите "Citroen Mehari" и "Fiat 600 Jolly".
Дизајниран за на плажа, "Spiaggina" ги следи стапките на стандардната верзија на овој модел, но се одликува со дизајн на возило со преклопен покрив од ткаенина што може делумно или целосно да се отстрани во „неколку едноставни чекори“.
Електричниот микроавтомобил најпрво ќе им биде понуден на купувачите во атрактивната верзија "First Edition", со двобојна каросерија.
Сопствениците ќе уживаат и во двобојната внатрешност со „веганска кожа“ која е отпорна на влага.
Двоседот има и под од вештачко дрво, дигитална табла со инструменти и волан со три краци.
Има и мал багажник со волумен од 230 литри.
Електричната енергија се складира во батерија од 10,5 kWh, која напојува електричен мотор од 17 коњски сили (12,5 kW). Досегот е 177 километри со едно полнење, а "Spiaggina" достигнува максимална брзина од 90 km/h.
Цената на моделот "Microlino Spiaggina First Edition" започнува од 24.990 евра, а првите испораки до купувачите во Европа се закажани за пролет 2025 година.
