Парфемот, наречен „Messi Eau de Parfum“ би треба да се појави на пазарот кон крајот на овој месец, пренесува „Ferrari Press Agency“.

Според пишувањата, Лионел ја покажал својата страст кон парфемите и креирањето на својот оригинален парфем. Новиот парфем доаѓа во сино, стаклено шише со голем натпис „Мessi“, а во продажба ќе бидат пуштени и гелот за туширање како и торбичка со логото на Меси.

Освојувачот на Светското првенство и поранешната ѕвезда на Барселона, моментално настапува за Интер Мајами.

„Отсекогаш имав страст кон парфемите и особено сум возбуден што ќе креирам парфем со мојот личен потпис. Ова е навистина единствен и инспиративен мирис, во персонализирано шише, наменет за сите фанови ширум светот“, изјави Меси.

Парфемот го креираше австралиска компанија „Game on Product Group“.

Барселона и Аргентина

Во својата сениорска кариера Меси настапувал за само три тимови. Најголем дел од кариерата ја помина во Барселона за којашто одигра 520 натпревари и постигна 474 голови.

Потоа се пресели во Пари Сен Жермен каде за две сезони одигра 58 натпревари и постигна 22 голови. Во Интер Мајами досега има одиграно 24 натпревари и оствари 18 погодоци.

Исто така Меси редовно се наоѓа во првиот тим на аргентинската репрезентација со која стана актуелен светски првак во фудбал, и за којашто има одиграно 188 натпревари, постигнувајќи 109 голови.

Меси е роден во Росарио, како трето од четирите деца. Татко му Хорхе работел во челичарница, додека мајка му Селиа работела во работилница за производство на магнети.

Започнал да тренира на шест години

На тренинзите го носела баба му (мајката на мајка му) која исто така се викала Селиа. Првите фудбалски чекори ги направил во клубот од неговиот роден град – „Newell’s Old Boys“ за којшто и навивал. Почнал да тренира фудбал на шест години, а неговиот идол бил бразилскиот фудбалер Роналдо.

Клубот му помогнал и да го надмине проблемот со дефицит на хормонот на растење, поради што тој е еден од пониските фудбалери со висина од 170 центиметри. Според одредени тврдења, неговата висина била причината поради која никогаш не постигнал договор со едниот од двата најголеми аргентински клубови Ривер Плејт. Меѓутоа тој успеа да се „пробие“ во Барселона поради што во 2001 година неговото семејство се пресели во Шпанија.

Поради својот физички изглед, многумина го споредуваа со неговиот сонародник и едниот од најдобрите аргентински фудбалери Диего Армандо Марадона.

Инаку, Меси е оженет со Антонела Ракуцо која ја познава од својата пета година, со којашто има тројца синови.