Германија не успеа да профитира од шансите кои ги создаде во првото полувреме во Солун и не дојде до резултат кој го заслужуваше, а потоа во второто полувреме почна да опаѓа во темпото и тимот на Јирген Клоп мораше да се задоволи со најнепопуларниот резултат.
Натпреварот на „Тумба“ стадионот заврши со резултат 0:0 и Германија остана третопласирана во својата група во Лигата на нации, а Јирген Клоп како селектор на оваа подновена репрезентација извлече први заклучоци за тоа како изгледал тимот во овој циклус кој почна во септември, а заврши на почетокот на октомври.
„Панцирите“ го архивираат овој период со една победа, еден пораз и два нерешени резултати, а Клоп најави дека во месец ноември ќе има доста поразличен тим од ова што го гледавме во изминатите десет дена, барем кога е во прашање бројот на повикани фудбалери.
– Многу сум задоволен бидејќи знам од каде дојдовме. Навистина многу, многу, сум импресиониран од тимот. Ако ништо друго, пријатно сум изненаден, а не разочаран. Не би поверувал дека сме способни да одиграме прво полувреме на начинот на кој одигравме против Грција. Момците прикажаа неверојатна игра – врвна во секој поглед, освен фактот дека не ги претворивме нашите шанси во голови, или не забележавме подобро позициониран соиграч во последната третина.
– Видовме многу играчи во текот на овие две недели. Секој покажа што може да направи, секој го заслужи своето место во тимот. Помислете на сите работи што луѓето ги кажаа за нас – што можеме да направиме, што не можеме да направиме. Покажавме знаци дека можеме да направиме неколку работи подобро отколку што луѓето ни дадоа признание. Вратата е отворена за сите и тоа широко отворена.
– Смирено ќе ги анализираме двете недели, а потоа за пет недели повторно ќе имаме два меѓународни натпревари со намален состав. Секако, нема да одиме таму со 44 играчи. Вратата е отворена за сите. Ако некој не е повикан, ќе знае дека тоа не е затоа што не е доволно добар, туку затоа што мора да застанеме на 23-24 играчи во репрезентацијата, – изјави Клоп кој за овој циклус повика дури 44 играчи.
