Според првите податоци на СНСД, кандидатот на оваа партија за претседател на Република Српска, Саво Миниќ, има околу 11.000 гласови повеќе од кандидатот на СДС, Бранко Блануша.

Првите информации пристигнуваат и од трката за српски член на Претседателството на БиХ. Според податоците на СНСД, нивната кандидатка Жељка Цвијановиќ има околу 15.000 гласови повеќе од второпласираниот кандидат на СДС, Маринко Божовиќ, додека Небојша Вукановиќ, според овие информации, е на последното место.

Во меѓувреме, според резултатите што ги објавуваат медиумите во Федерацијата БиХ, на многу мал примерок од преброените гласови Даријана Филиповиќ има мала предност во трката за хрватски член на Претседателството на БиХ.

Во трката за бошњачки член на Претседателството, по преброени нешто повеќе од 3.000 гласови, Денис Беќировиќ е пред Бакир Изетбеговиќ.

Станува збор за први прелиминарни и неофицијални податоци, собрани од мал примерок, додека официјалните резултати од Централната изборна комисија на БиХ сè уште не се објавени.

СНСД во Добој прогласи убедлива победа на сите нивоа

Сојузот на независни социјалдемократи (СНСД) во Добој прогласи убедлива победа на сите нивоа на денешните избори.

Од партијата велат дека станува збор за најубедлива победа на СНСД на републичките избори, пренесува РТРС.

На некои избирачки места предноста на Саво Миниќ е и петпати поголема од бројот на гласовите што ги добива кандидатот на СДС, Бранко Блануша.

Во месната заедница Мајевац, Миниќ има 205 гласови, додека Блануша има девет. Во Палeжница кандидатот на СНСД има 151 глас, наспроти 20 за СДС, додека во Трњани разликата во корист на Миниќ изнесува 187 гласови.

Во Република Српска и Федерацијата БиХ денеска се одржуваат избори за претставници во заедничките, ентитетските и кантоналните институции.

Граѓаните со право на глас избираат три члена на Претседателството на БиХ, пратеници во Претставничкиот дом на Парламентарното собрание на БиХ и во Претставничкиот дом на Парламентот на Федерацијата БиХ, претседател и двајца потпретседатели на Република Српска, пратеници во Народното собрание на Република Српска, како и пратеници во собранијата на 10 кантони во Федерацијата БиХ.

СНСД: Саво Миниќ и Жељка Цвијановиќ се пред голема победа

Кандидатите на СНСД за претседател на Република Српска и српски член на Претседателството на БиХ, Саво Миниќ и Жељка Цвијановиќ, се пред голема победа на денешните избори, изјави портпаролот на СНСД, Радован Ковачевиќ.

„Нашиот кандидат за претседател на Република Српска, Саво Миниќ, има 45.500 гласови, а кандидатот на СДС, Бранко Блануша, има 33.000 гласови. Тоа е сериозен тренд и сериозна предност и претседателот на СНСД, Милорад Додик, многу брзо ќе прогласи победа“, изјави Ковачевиќ.

Тој ги соопшти и моменталните резултати за српски член на Претседателството на БиХ.

„Жељка Цвијановиќ има 31.400 гласови, Маринко Божовиќ има 15.000, а Небојша Вукановиќ 6.000 гласови“, додаде Ковачевиќ.

Тој вели дека, според податоците од скенерите што активистите на СНСД ги испраќаат во партиската база, голем број градови им даваат поддршка на кандидатите на СНСД.

„Двајцата наши кандидати водат и во Бања Лука, Мркоњиќ Град, Нови Град, Козарска Дубица, Градишка, Србац, Прњавор, Челинац, Дервента, Шипово, Котор Варош, Пелагиќево, Лопаре, Модрича, Источна Илиџа, Рогатица, Вишеград, Добој, Соколац, Трново, Пале, Берковиќи, Билеќа и Требиње“, додаде Ковачевиќ.

Претседателот на СНСД, Милорад Додик, на мрежата Икс напиша дека во СНСД владее „одлично расположение“ и дека резултатите личат на победа на „Саво Миниќ“.

Во меѓувреме Додик се обрати пред јавноста и прогласи победа на СНСД на сите нивоа. „Прогласувам победа на сите нивоа. Им благодарам на сите. Ова е резултат сличен на оној од пред 20 години“, изјави Додик. Успехот на СНСД, како што рече, делумно го припишува на политичката атмосфера во Соединетите Американски Држави.

„Да немаше величествена победа на Трамп, веројатно денеска ќе бевме политички мртовци, но благодарение на новиот амбиент, сега сме политички победници“, изјави Додик.

Тој додаде: „Многу ми е драго што победивме, вака ги пореметивме сите“.

Кандидатката на СНСД, Жељка Цвијановиќ, води во трката за член на Претседателството на БиХ со 55,34 проценти од гласовите.

Зад неа е Маринко Божовиќ од СДС со 26,59 проценти, додека Небојша Вукановиќ има 18,5 проценти од гласовите.

Во Претставничкиот дом на Парламентарното собрание на БиХ, СНСД исто така ќе има најмногу мандати, со оглед на тоа што во Република Српска освои 40,95 проценти од гласовите.

По СНСД, партијата „Покрет Сигурна Српска“ на Драшко Станивуковиќ има 15,15 проценти, СДС има 13,18 проценти, додека „За правда и ред“ на Небојша Вукановиќ има 5,80 проценти.

Во Народното собрание на Република Српска, СНСД освои 38,93 проценти од гласовите, „Двжење Сигурна Српска“ има 14,19 проценти, а СДС 12,27 проценти.

Засега изборниот праг го минуваат и ДНС, СП, „Обединета Српска“, СПС и „За правда и ред“.

Кои избори се одржуваат во БиХ?

На изборите во Босна и Херцеговина и Република Српска се избираат:

три члена на Претседателството на БиХ;

пратеници во Претставничкиот дом на Парламентарното собрание на БиХ;

пратеници во Претставничкиот дом на Парламентот на Федерацијата БиХ;

претседател и двајца потпретседатели на Република Српска;

пратеници во Народното собрание на Република Српска;

пратеници во собранијата на 10 кантони во Федерацијата БиХ.

На изборите учествуваат 75 политички партии, 29 коалиции и четворица независни кандидати, односно вкупно 108 политички субјекти.

Централната изборна комисија завери вкупно 7.028 кандидати, кои се борат за 518 мандати. Во Централниот избирачки список се запишани 3.408.517 гласачи.

За српски член на Претседателството на БиХ од Република Српска кандидати се Жељка Цвијановиќ, Небојша Вукановиќ и Маринко Божовиќ.

За бошњачки член на Претседателството кандидати се Денис Беќировиќ, Бакир Изетбеговиќ, Семир Ефендиќ и Фахрудин Радончиќ.

За хрватски член кандидати се Даријана Филиповиќ, Славен Ковачевиќ и Зденко Лучиќ.

За претседател на Република Српска кандидати се Саво Миниќ, Бранко Блануша, Богдан Јовановиќ, Иван Бегиќ, Фрањо Јукиќ, Игор Балукчиќ, Иво Камењашевиќ, Марко Јоргиќ, Рамиз Салкиќ, Јусуф Арифагиќ, Бегија Смајиќ и Чамил Дураковиќ.

Меѓу главните кандидати за премиер на Република Српска се Драшко Станивуковиќ од „Сигурна Српска“ и Игор Додик од СНСД.