Израелската влада верува дека инцидентот на летот од Обединетите Арапски Емирати кон Израел, кој утрово беше пренасочен кон Саудиска Арабија откако испратил сигнал за опасност, можеби бил обид за терористички напад извршен од еден од пилотите, изјавиле двајца израелски функционери.

Според нив, постои сомнеж дека копилотот го избодел капетанот пред кабинскиот персонал да влезе во пилотската кабина и да ја преземе контролата врз авионот.

Еден израелски функционер претходно за „Ројтерс“ изјавил дека авионот испратил сигнали за опасност откако меѓу пилотите дошло до физичка пресметка.

Приближно во времето кога авионот слетал во Саудиска Арабија, Дорон Спилман, портпарол на кабинетот на израелскиот премиер, за „Ројтерс“ изјавил дека не се верува оти станува збор за киднапирање, опишувајќи го настанот како „поинаков вид инцидент“.

Тој веднаш не одговорил на дополнителното прашање дали Израел го третира случајот како терористички инцидент.

Двајцата функционери, кои зборувале под услов да останат анонимни, изјавиле дека актуелната проценка на Израел е дека станува збор за обид за „терористички напад“, а не за проблем поврзан со менталното здравје на некој од пилотите.

Авионот нагло изгубил височина

Во видеоснимка на која наводно се гледа израелски патник од летот на „Флајдубаи“, а која ја објавија израелските медиуми, патникот наведува дека еден од пилотите бил тешко, а другиот полесно повреден откако дошло до напад со нож.

Од аеродромот во Табук во Саудиска Арабија, каде што авионот на крајот безбедно слетал, соопштиле дека двајцата пилоти се хоспитализирани поради здобиените повреди.

Ниту аеродромот, ниту споменатиот израелски патник не го идентификувале напаѓачот.

Летот FZ1073 од Дубаи за Тел Авив бил пренасочен кон Саудиска Арабија додека летал над јорданскиот воздушен простор. Авионот најпрво испратил општ сигнал за опасност, а потоа и сигнал што укажува на можно незаконско попречување на летот, соопшти порталот за следење летови „Flightradar24“.

Авионот „Боинг 737“, во кој според израелските медиуми имало околу 150 израелски патници, потоа повторно го емитувал првичниот општ сигнал за опасност пред да слета на аеродромот во Табук, во северозападниот дел на Саудиска Арабија.

Податоците за летот покажуваат дека авионот нагло и брзо се спуштил за речиси 4.200 метри, односно 14.000 стапки, за помалку од 30 секунди пред да го испрати првиот сигнал за опасност, наведува „Flightradar24“.

Засега не е јасно кој точно ги испраќал тие сигнали.

Спротивставени информации во медиумите

Израелските медиуми објавија различни информации за инцидентот. Некои од нив објавија дека пилотот наводно се обидел да го урне патничкиот авион во обид за самоубиство.

Некои израелски медиуми ги идентификувале пилотите како државјани на Оман и Обединетите Арапски Емирати, додека други наведувале дека станува збор за Русин и Украинец.

Инцидентот предизвикал итни консултации за националната безбедност во Израел, кој нема официјални дипломатски односи со Саудиска Арабија, каде што авионот бил приземјен.

Во соопштение од кабинетот на израелскиот премиер се наведува дека ситуацијата е „под контрола“ и дека се преземаат сите мерки за израелските патници да бидат вратени во Израел.

Премиерот Бенјамин Нетанјаху, кој претходно одржал безбедносни консултации, ги откажал сите преостанати обврски за тој ден за да управува со кризата, потврдил израелски функционер.

Нетанјаху во неделата се сретна со претседателот на ОАЕ, шеикот Мохамед бин Зајед Ал Нахјан, за време на ретка посета на оваа заливска земја.

Израел и Обединетите Арапски Емирати воспоставија блиски безбедносни, воени и економски врски по нормализирањето на односите во 2020 година.

Претходно оваа година Израел им обезбеди на ОАЕ системи за противвоздушна одбрана „Железна купола“ и персонал за управување со нив заради одбрана од ирански напади.

Патниците во шок

Обединетите Арапски Емирати сè уште официјално не се изјасниле за инцидентот, додека авиокомпанијата во сопственост на Дубаи соопштила само дека на летот се случил „инцидент“ и дека авионот бил пренасочен кон Табук, каде што безбедно слетал. Од компанијата додале дека сите патници се безбедни и дека сите се евидентирани.

Јасмин Абукасис изјавила дека нејзината ќерка Миријам, која била меѓу патниците на летот, ѝ кажала дека слушнала вресоци и дека маж со нож соборил еден од пилотите на под, при што насекаде имало крв.

Израелските медиуми објавија фотографија наводно направена во авионот, на која се гледа крвава маица на еден од патниците. Reuters во тој момент не можел независно да ја потврди автентичноста на фотографијата.

Компанијата „Флајдубаи“ секојдневно лета на релацијата меѓу Дубаи и Тел Авив, која е исклучително популарна меѓу израелските државјани.

Вообичаената рута на летот минува низ воздушниот простор на Саудиска Арабија и Јордан.

Ова не е првпат лет меѓу Израел и ОАЕ да слета во Саудиска Арабија. Лет на „Флајдубаи“ од Дубаи за Тел Авив во септември 2025 година принудно слетал во Ријад поради итен медицински случај, објавија тогаш израелските медиуми.