Во Карпош 1 е вандализирано детско игралиште, при што се оштетени повеќе детски реквизити и урбана опрема. Општината потсетува на важноста од одговорно однесување и ги повикува граѓаните да се грижат за јавните површини.
Повеќе детски реквизити, како и дел од останатата урбана опрема, се оштетени на детско игралиште во Карпош 1, информира Општина Карпош.
Од Општината велат дека повторно се соочуваат со вандализирање на јавната и урбаната опрема.
Општина Карпош секоја година издвојува средства за одржување, обновување и унапредување на јавните површини, а континуирано инвестира и во поставување и реконструкција на детски игралишта и урбана опрема.
„За жал, вложувањата во создавање безбедни и уредни простори за најмладите повторно се доведуваат во прашање поради неодговорното однесување и вандалските случаи“, наведуваат од Општината.
Оттаму потсетуваат дека јавните површини се заедничко добро на сите граѓани и апелираат на одговорно однесување и заеднички придонес во нивното зачувување.
