Од ВМРО-ДПМНЕ велат дека пензискиот фонд е стабилен, пензиите се зголемени и исплатени редовно, а СДС нема кредибилитет за политички обвинувања поради нивните минимални зголемувања во претходниот мандат.
СДС да не шират паника, Филипче да не се грижи, пензискиот фонд е стабилен, велат од ВМРО-ДПМНЕ.
„Пензионерите денес имаат конкретни резултати кои што се мерливи со бројки, а не со дневнополитички обвинувања и блед обид за собирање на политички поени на СДС. За помалку од две години, пензиите се зголемени за околу 7.000 денари, што е значително повеќе од зголемувањето од 540 денари во првите две години од мандатот на СДС. СДС нема кредибилитет да зборува за пензиите. Во првите 2 години од доаѓањето на СДС на власт, од јуни 2017 година до јуни 2019 година, Заев и Филипче пензиите ги зголемиле за 540 денари. За време на СДС и ДУИ, над 200 илјади пензионери примаа пензии под 14 илјади денари, а зголемувањата беа минимални и недоволни за реално подобрување на животниот стандард“, велат од партијата.
Од таму додаваат дека денес, пензиите се исплаќаат редовно, а државата обезбедува средства за непречено функционирање на пензискиот систем. Затоа, велат од ВМРО-ДПМНЕ, наместо СДС да шири паника и да пласира политички конструкции, нека се соочи со фактите и со реалноста на пензионерите.
„Пензионерите најдобро знаат како живееја во годините на владеење на СДС и ДУИ, а како живеат денес. СДС е партија која нема економска стратегија за државата. Така беше во минатото, кога 7 години ги ограбија граѓаните, а државата ја оставија пред банкрот, а така е и денес, имаат само лаги и празни ветувања за граѓаните. СДС и Венко Филипче немаат план за развој и економска визија на државата, немаат стратегија за привлекување нови инвестиции, за отворање на нови фабрики, нови работни места. Со Владата на ВМРО-ДПМНЕ пензиите се повисоки, исплатата е редовна, а државата ги обезбедува потребните средства за стабилно функционирање на системот. Пензионерите заслужуваат повисоки и редовно исплатени пензии, сигурност и достоинствен живот, а не политички игри со нивната егзистенција. СДС да не ги злоупотребува пензионерите“, велат од ВМРО-ДПМНЕ.
