Во Турција од последиците од употребата на тутун годишно умираат околу 125.000 луѓе, што во просек значи по едно лице на секои четири минути.
Една петтина од смртните случаи се однесуваат на „пасивни пушачи“ – лица кои не биле пушачи, но често биле изложени на чад од тутун, пишува агенцијата „Anadolu Ajansı“.
Турција го зазема првото место во светот според зачестеноста на ракот на белите дробови кај мажите и смртните случаи поврзани со оваа болест.
Според ажурираните податоци на Светската здравствена организација (СЗО) од 26 јуни, тутунот може да го оштети речиси секој орган во телото, предизвикувајќи рак, срцеви заболувања, мозочен удар и белодробни заболувања, како и намалена плодност, слабеење на имунолошкиот систем и прерана смрт.
Секоја година од последиците од пушењето во светот умираат повеќе од седум милиони луѓе.
Во чадот од цигарите се наоѓаат околу 4.000 хемикалии и токсини, од кои 50 се канцерогени.
Влијанието на тутунот врз животната средина се протега од производството до отпадот што останува по неговата употреба.
Според податоците на СЗО за влијанието врз животната средина, тутунската индустрија предизвикува губење на приближно 600 милиони дрвја ширум светот секоја година, користи 200.000 хектари земјиште, троши 22 милијарди тони вода и испушта 84 милиони тони јаглерод диоксид.
Се проценува дека приближно 4,5 трилиони филтри од цигари секоја година ги загадуваат океаните, реките, градовите, парковите, почвата и плажите.
