Општина Ѓорче Петров го поддржува почетокот на учебната година на 410 првачиња со бесплатни анатомски ранци, училишен прибор и финансиска поддршка од 3.000 денари, како дел од мерки за олеснување на трошоците и обезбедување еднакви услови за образование.
Општина Ѓорче Петров и оваа учебна година продолжува со конкретна поддршка за најмладите ученици и нивните семејства.
Во новата учебна година, во основните училишта на територијата на општината се очекуваат 410 првачиња, а секое од нив ќе добие бесплатно анатомско ранче и училишен прибор.
„Во изборот на ранчињата, денес учествуваа и идните првачиња од детската градинка „Росица“, со што најмладите директно беа вклучени во подготовките за нивниот прв училишен ден.
Дополнително, со почетокот на учебната година, секое прваче ќе добие и еднократна парична поддршка во износ од 3.000 денари од Општина Ѓорче Петров, како и бесплатна ужинка“, извести Општина Ѓорче Петров.
„Со овие мерки, општината има за цел да им помогне на семејствата во периодот кога трошоците за почетокот на учебната година се зголемени, но и да обезбеди еднакви и достоинствени услови за секое дете кое го започнува своето образование.
Инвестициите во образованието, подобрувањето на условите во училиштата и директната поддршка за учениците и родителите остануваат еден од приоритетите на Општина Ѓорче Петров“, се додава во соопштението.
