[ВИДЕО] Директор на супермаркет под истрага по смртоносниот руски напад во Криви Рих

Украинската полиција покрена кривична постапка против директорот на супермаркет кој се наоѓа во склоп на трговски центар во Криви Рих, по смртоносниот руски напад со дронови во кој загинаа најмалку 16 лица, а 130 беа повредени, меѓу кои и 23 деца.

Украинскиот министер за внатрешни работи Иван Вихивски потврди дека директорот се истражува поради сомнение за немарност, бидејќи супермаркетот, наводно, останал отворен и откако била прогласена воздушна тревога.

Според украинските власти, поминале околу 20 минути од огласувањето на воздушната тревога до првиот удар со дрон. Значителен број од жртвите биле пронајдени токму во супермаркетот.

Истрагата треба да утврди дали вработените и посетителите навреме биле известени за опасноста, дали евакуацијата била спроведена навреме и дали биле почитувани безбедносните протоколи. Се проверуваат и наводите дека вратите на засолништето биле блокирани.

Покрај директорот на супермаркетот, полицијата ќе ја испитува и одговорноста на лица на раководни позиции во компанијата која управува со трговскиот центар, како и на други деловни субјекти кои работат во објектот.

На местото на нападот и натаму трае потрагата по преживеани и исчезнати лица.

„За време на воздушни тревоги клучно е брзо да се реагира за да се спречат гужви и да се заштитат човечките животи“, изјави Вихивски.

Украинскиот министер ги повика управителите на деловните објекти, особено оние во областите блиску до фронтот, сериозно да ги сфатат безбедносните закани и навреме да преземаат мерки за заштита на граѓаните.

Нападот врз трговскиот центар е еден од најсмртоносните во последните руски напади врз Криви Рих.