Германски лекар за палијативна нега е осуден на доживотен затвор за убиство на 15 пациенти. Според судот, тој им давал смртоносна комбинација на лекови без согласност, при што властите истражуваат уште други сомнителни случаи.
Германски лекар за палијативна нега е осуден на доживотен затвор откако судот во Берлин го прогласи за виновен за убиство на 15 од неговите пациенти. Судот го прогласи 41-годишниот Јоханес М. за виновен за убиство на дванаесет жени и тројца мажи помеѓу септември 2021 година и јули 2024 година, објави Би-Би-Си.
Жртвите биле на возраст од 25 до 94 години и, иако сите биле сериозно болни, нивната смрт не била неизбежна, според судот. Властите се сомневаат дека ова е само врвот на ледениот брег, бидејќи обвинителите истражуваат десетици други сомнителни случаи поврзани со осудениот лекар.
Според обвинителството, лекарот им дал на пациентите смртоносна комбинација од лекови за време на домашните посети без нивна согласност.
Кратко пред неговото апсење во јули 2024 година, тој убил двајца пациенти во истиот ден: 75-годишен маж во својот дом во центарот на Берлин, и само неколку часа подоцна 76-годишна жена во соседна населба. Обвинителите, исто така, рекоа дека по второто убиство, тој се обидел да го запали домот на жената, но не успеал.
Докторот молчел поголемиот дел од судењето, кое траело околу една година. Дури минатиот месец признал дека „убивал луѓе“, мислејќи на дванаесет од неговите тешко болни пациенти.
Тој му рече на судот дека се убедил себеси дека го прави правилното нешто и со тоа ги поштедува од „страдање и беспомошност“. „Мислев дека така е најдобро за сите“, рече тој. Исто така, се извини за сите страдања што ги предизвикал.
Властите се сомневаат дека бројот на жртви е многу поголем, а обвинителите во моментов истражуваат уште 76 случаи. Германските медиуми објавуваат дека доколку биде прогласен за виновен и во овие случаи, тој би можел да биде еден од најголемите сериски убијци во германската историја.
Членовите на семејството на жртвите сведочеа за време на судењето, нагласувајќи дека не можат да поверуваат што се случило. Мајката на најмладата жртва, 25 годишна девојка која почина во 2021 година, низ солзи рече: „Таа никогаш не рече дека не сака повеќе да живее“.
Синот на 72-годишна жена која почина во 2024 година рече дека неговата мајка планирала патување до Балтичкото Море со нејзината сестра. „Мајка ми сакаше да живее“, рече тој.
фото/Depositphotos
