Иран ги нападна американските бази ширум регионот како одговор на американско-израелската војна, поради што многу војници мораа да ги напуштат своите позиции. Како што наведува „Њујорк тајмс“, голем дел од копнените сили сега практично ја водат војната работејќи „од далечина“, додека пилотите и екипажите на борбените авиони продолжуваат да изведуваат напади.

Пентагон продолжува со операциите, но…

Иранската Револуционерна гарда го повика населението да пријавува нови локации на американските војници, обидувајќи се да ги лоцира расфрланите сили. Американски воени претставници тврдат дека таа закана не го спречува Пентагон да продолжи со операциите во војната, која влезе во четвртата недела.

„Досега погодивме повеќе од 7000 цели низ Иран и неговата воена инфраструктура“, изјави минатата недела американскиот министер за одбрана Пит Хегсет. „Денес ќе биде најголемиот пакет удари досега, исто како што беше и вчера“, додаде тој.

Преместувањето на војниците на импровизирани локации, кои еден функционер ги опишал како „алтернативни“, го отвора прашањето колку администрацијата на американскиот претседател Доналд Трамп била подготвена за војна.

Војна од хотели и импровизирани центри

Во моментот на почетокот на судирот, во регионот имало околу 40.000 американски војници. Американската Централна команда распоредила илјадници од нив, некои дури и во Европа, додека дел останале на Блискиот Исток, но веќе не во првичните бази, наведува „Њујорк тајмс“.

Резултатот е според сегашни и поранешни воени функционери, војна што е значително потешко да се води.

„Да, имаме способност да воспоставиме привремени оперативни центри, но сигурно губите дел од капацитетот“, рекол Вес Џ. Брајант, пензиониран специјалист за таргетирање во американското воено воздухопловство. „Не можете сета таа опрема едноставно да ја поставите на врв од хотел. Дел од неа е едноставно преголема“, додал тој. Американскиот функционер нагласил дека војниците не работат од покривите на цивилни хотели.

Тешки удари врз базите и инфраструктурата

Иран силно одговори на заедничките американско-израелски напади, гаѓајќи не само воени бази, туку и амбасади, како и нафтена и гасна инфраструктура низ целиот регион.

Откако беа убиени врховниот водач и десетици други функционери, иранскиот режим започна одмазда со лансирање стотици дронови и проектили кон соседните земји и во голема мера го затвори Ормускиот теснец, клучна поморска рута, со што војната доби глобални последици.

Најтешко погодени базите во Кувајт

Многу од 13-те бази што ги користат американските сили станаа речиси неупотребливи, а најтешко погодени се оние во Кувајт, соседот на Иран. Во нападот на пристаништето Шуаиба беа убиени шест американски војници, а беше уништен и тактички оперативен центар.

Иранските напади ги погодија и воздухопловната база Али Ал Салем и кампот Бјуринг, каде што беа оштетени објекти и инфраструктура. Во Катар беше погодена базата Ал Удеид, каде што беше оштетен системот за рано предупредување, додека во Бахреин беше нападнат штабот на Петтата флота. Во Саудиска Арабија беа оштетени комуникациска опрема и повеќе цистерни за гориво.

Иран ги гаѓа и цивилите, ризикот расте

Проиранска милиција во Ирак изврши напад со дронови врз луксузен хотел во Ербил на почетокот на судирот. Иранските власти ги обвинија САД дека користат цивили како жив штит, бидејќи американските војници ги сместуваат во хотели.

„Принудени сме да ги идентификуваме и гаѓаме Американците“, објави разузнавачката служба на Револуционерната гарда, пренесе иранската агенција Тасним. „Затоа е подобро да не ги сместувате во хотели и да се држите подалеку од нивните локации“, порачаа тие, повикувајќи ги граѓаните информациите да ги испраќаат преку Телеграм.

И покрај силната воздушна кампања, Иран и натаму има одредени способности, признал началникот на Здружениот штаб на американската војска Дан Кејн.

Пентагон под притисок

Кејн изјавил дека слоевитата одбрана овозможува заштита на американските сили и интереси, но и дека Пентагон се обидува дополнително да ја зајакне одбраната во регионот.

Проблемот за Пентагон делумно произлегува од искуството од војните во Ирак и Авганистан, каде што САД брзо воспоставија воздушна надмоќ и градеа бази блиску до бојното поле.

За разлика од тогашните противници, Иран располага со балистички проектили, што сега ги прави американските бази во Кувајт, Бахреин, Саудиска Арабија и Катар ранливи, до таа мера што војниците таму повеќе не можат долгорочно да престојуваат, наведуваат функционери.

Некои воени извори сметаат дека администрацијата погрешно проценила како ќе реагира Иран. Пред почетокот на војната не биле евакуирани неесенцијалните вработени од амбасадите, ниту биле издадени предупредувања за американските граѓани.

Грешки во подготовката и ризик од ескалација

Двајца поранешни американски функционери изјавиле дека командните центри во Саудиска Арабија немале зајакнати покриви, што довело до загинување на еден војник и ранување на други.

Американските танкери за гориво биле испратени во војна без доволно време за подготовка, а овој месец се судриле два авиона КЦ-135, при што загинале шест војници. Инцидентот е под истрага.

Брајант истакнал дека американската војска има силна способност да дејствува во децентрализирани услови. „Можете да ѝ ја отсечете главата на змијата, но ние до последниот војник и понатаму ќе дејствуваме“, рекол тој.

Сепак, предупредил дека таквиот начин на војување има цена. „Секогаш нешто губите“, заклучил тој.