На прв поглед концептот може да потсети на новиот "Megane", но „Renault“ нагласува дека не е директно поврзан со некој иден сериски модел.

Наместо тоа, служи како демонстрација на филозофијата „voitures à vivre“, односно возила прилагодени на секојдневните потреби на корисниците.

Дигитална кабина

Внатрешноста е изразено дигитализирана. Закривениот „OpenR Panorama“ екран се протега по целата ширина на командната табла и прикажува информации за возењето, мултимедијални содржини и податоци од системите за асистенција.

Поголемиот дел од функциите се контролираат преку централниот екран чувствителен на допир, кој е поставен нешто пониско, во средишниот дел на командната табла.

Концептот користи и нетипичен управувач со технологија „steer-by-wire“, без механичка врска со управувачкиот систем.

Алкотест и вештачка интелигенција

Меѓу новите безбедносни решенија се наоѓа и тактилен алкотест интегриран во возилото.

„Renault“ тестира и примена на вештачка интелигенција, вклучувајќи дигитален безбедносен асистент и персонализирано прилагодување на функциите на автомобилот.

Флексибилен простор во кабината

Кабината е замислена како флексибилен простор. Возилото има компактен „one-box“ дизајн со должина од околу 4,5 метри и висина од околу 1,5 метри.

Благодарение на интеграцијата на воздушното перниче за совозачот во седиштето, на командната табла има повеќе простор за практични елементи како прилагодлив преградник што може да служи и како полица.

Позади се наоѓаат три поединечни седишта со иста ширина, чии потпирачи може да се спуштат, додека седечкиот дел може да се подигне по потреба.

Рамниот под овозможува различни распореди во внатрешноста, па просторот може да се прилагоди за багаж или дури за превоз на велосипед. Задните врати се отвораат под агол од 90 степени, што го олеснува влегувањето и излегувањето од возилото.

Големите стаклени површини дополнително го нагласуваат чувството на пространост. Предното ветробранско стакло преминува во целосно застаклен покрив, додека тенките столбови и вратите без рамки пропуштаат повеќе природна светлина во кабината.

Со овој концепт „Renault“ истражува како дизајнот на просторот, дигиталните функции и практичноста би можеле да се спојат во автомобилите на иднината.