Со растот на кибернетичките, информациските и влијателните напади, овие зони стануваат нови боишта. Случајна искра во кое било од овие подрачја, тврди Фокс, би можела да предизвика глобална ескалација.

1. Балтик

Рускиот претседател Владимир Путин предупреди дека ќе ја продолжи борбата за „целосна победа“ во Украина, со закани кон Европа дека е подготвен за војна ако таа се спротивстави. Фокс предвидува дека Русија ќе ги тестира НАТО и ЕУ на повеќе критични точки, особено во балтичкиот регион и во северниот Атлантик. Енклавата Калининград е потенцијално место за инциденти под „лажно знаме“, каде што Русија би можела да ги прикаже акциите на НАТО како агресија. Неодамнешни инциденти, како попречување на граничните патроли на границите на Норвешка и Естонија, укажуваат на оваа стратегија.

Руските подморници, поддржани од разузнавачки бродови, ќе ги зголемат патролите во британските води и во Балтичкото Море, тестирајќи го системот за рано предупредување на НАТО. Кремљ би можел да ги искористи несогласувањата меѓу Америка на Трамп и европските сојузници, особено околу спорот меѓу САД и Данска за Гренланд, со цел да ја дестабилизира регијата пред НАТО да ги заврши плановите за повторно вооружување.

2. Венецуела

Друго големо подрачје на опасност за Соединетите Американски Држави е самиот американски континент. Не станува збор само околу прашањето за промена на режимот во Венецуела, на кое Трамп сега, очигледно, му наметнал голема важност.

Секое американско навлегување во Венецуела носи ризик од повторување на грешките направени со инвазијата на Ирак во 2003 година. Како што забележал поранешниот генерал и државен секретар Колин Пауел, ако нешто скршите во ваквите акции, вие сте одговорни за проблемот. Би постоела итна потреба од реформа и водење на безбедносните сили и јавната администрација, или би се соочиле со години граѓанска војна, како во Ирак.

3. Блискиот Исток и Африка

Третата регија, Блискиот Исток, претставува жариште на ризик за понатамошни војувања – од Курдистан на север, до Арапскиот Полуостров, Судан и Сомалија низ потсахарска Африка. Газа и понатаму е жариште, како и Јемен и Судан. Во Јужен Јемен и Судан, посредниците на двете најголеми сили од Заливот – Саудиска Арабија и ОАЕ – се во отворена војна. Нестабилниот режим во Иран би можел да го избере својот момент за напад, директно врз Израел или преку дејствување со посредници – од Сирија, па сè до милицијата РСФ во Дарфур и пошироко.

„Во Судан нема никаков чувство на безбедност“, истакнал Пасквале Ферара, кој со години ја обликува италијанската политика за регионот, „но има огромна количина оружје“. Борбите на границите меѓу Руанда и Демократска Република Конго имаат стратешки импликации, со оглед на натпреварувањето за минерали меѓу агентите на Кина, поранешната руска група Вагнер и моќните организирани криминални банди.

4. Индија и Пакистан

Во јужна и југоисточна Азија, неколку конфликти имаат потенцијал за ескалација. Пакистан и Индија меѓусебно се набљудуваат поради Кашмир и Авганистан, а Индија се соочува и со Кина долж својата граница во високите планини. Камбоџа и Тајланд не се целосно во мир, што и да тврди Доналд Трамп, иако е малку веројатно дека проблемите ќе се прошират.

5. Тајван

Во 2025 година, Си Џинпинг и неговиот режим беа глобални велемајстори на уметноста на стратешката двосмисленост, надмудрувајќи ги Доналд Трамп и Владимир Путин таму каде што тоа беше важно. Следната година Си би можел да пресмета дека Доналд Трамп е премногу окупиран со Венецуела, Украина, Газа и со сопствениот его за навреме да реагира, доколку Кина се обиде на решителен потег против Тајван, преку отворени или прикриени средства. Погрешно темпирана и неуспешна иницијатива за Тајван би предизвикала огромна реакција кај сите главни регионални актери, вклучувајќи ги Индија и Јапонија, Австралија и Америка. Во најлош случај, тоа носи ризик од вистински глобален конфликт.

Фокс ја предупредил британската влада дека мора брзо да реагира на овие закани, особено на порастот на кибернетичките и информациските напади што ги придружуваат традиционалните конфликти. Без итни мерки, 2026 година би можела да донесе непредвидливи последици за глобалната безбедност. „Случајна искра во кое било од овие жаришта би можела да предизвика поширока конфронтација“, истакнал Фокс, повикувајќи на зајакнување на капацитетите на НАТО и на мултилатерална соработка за да се спречи ескалација, пренесе „Independent“.