Во сараевското основно училиште „Шејх Мухамед еф. Хаџијамаковиќ“, учениците имаат посебен пријател – мачорот Мирза, кој веќе пет години секојдневно ги пречекува децата на училишните ходници.
Овој „крзнен училишен пријател“ им прави друштво на децата за време на наставата, на одморите, па дури и во ходниците на училиштето.
„Некако доаѓа како најдобар пријател. Ние бевме мали и тој беше мал кога дојде. Најдобро се разбираме“, вели ученичката Есма.
Неговото присуство, додаваат наставниците и училишниот психолог, придонесува за смиреност кај децата, го намалува стресот и автоматски го подобрува расположението во текот на училишниот ден.
Мирза не е само пријател – тој е и инспирација. Учениците пишуваат песни за него, снимаат филмови од негова перспектива, а грижата и вниманието кон мачорот им помагаат на децата да развијат чувство на одговорност и емпатија.
„Генерално, постои голем број придобивки што произлегуваат од грижата за домашно милениче, како од психолошки аспект, така и поради одговорноста што децата ја развиваат кога знаат дека треба да се грижат за некоја друга личност“, истакна директорката на училиштето, Емина Хрлиќ.
Мирза бил донесен во училиштето пред пет години од поранешна вработена, а оттогаш станал вистински член на училишната заедница. Учениците и наставниците го хранат и го гушкаат, а неговото присуство го прави секој училишен ден потопол и повесел. „На почетокот не се согласувавме баш најдобро, но со текот на времето, кога видов како другите ученици го галат и го хранат, и јас пробав, па сега постојано се дружиме и се гушкаме“, додава ученикот Емин.
Мачорот Мирза не е само миленик – тој е училишен симбол на пријателство, радост и мали, секојдневни чуда што им го разубавуваат животот на учениците, пишува „BBC“.
