Секоја вечер, кога светлата се пригушуваат и вратите се заклучуваат, волонтерката Касондра Кристман фрла последен поглед кон редовите боксови во засолништето на Друштвото за заштита на животните Мауи. Таа глетка, како што вели, е најтешкиот дел од денот и момент кој редовно ѝ го крши срцето.
„За мене тоа е еден од најемотивните моменти во денот“, изјави таа. Поради големиот број кучиња, не успева секое од нив да го изведе на игра за време на својата смена. Тоа значи дека многумина остануваат да ја гледаат додека си заминува, надевајќи се на некоја закуска, уште неколку моменти на свеж воздух или едноставно на надеж дека некој ќе се врати по нив. „Едноставно не можам да замислам што сè им минува низ главата“, додаде таа.
Приказната за кучето Мајки
Во низата тажни погледи, еден особено се истакнувал – оној на кучето Мајки, кое секогаш ја испраќало со поглед.
Моментот на разделба го споделила во трогателно видео на „Инстаграм“. На снимката се гледа како го заклучува засолништето, а додека многу кучиња веќе спиеле, Мајки стоел во својот бокс и ја набљудувал без да трепне.
„Јас сум последната што си заминува и го гледа ова. Мајки само се надева дека и тој ќе си замине“, стои во описот на видеото.
„Се надеваше дека можеби ќе си замине со мене – можеби до дворот, можеби дома – којзнае, но беше најнадежното и најтрпеливото куче што сум го видела“, раскажа Кристман.
Таа додаде дека Мајки со часови останувал на истото место. „Цел ден чекаше таму сè додека не заклучам навечер. Беше поразително. Сите боксови околу него изгледаат празни, но тоа е само затоа што другите кучиња спијат – но не и Мајки“.
Среќен крај благодарение на интернетот
Видеото со Мајки трогна многумина, собра повеќе од 300.000 прегледи и истото за него претставуваше животен пресврт. „И тогаш, некој тука на Мауи го виде видеото“, рече Кристман. „Дојдоа, го запознаа и тој сега официјално е вдомен“.
Кристман е благодарна што луѓето ја разбрале пораката на видеото – не само приказната на Мајки, туку и секојдневната реалност на напуштените животни. „Ценев што сите го разбраа скршеното срце – и неговото и моето – во тој момент и секоја вечер кога си заминувам“, изјави таа.
Иако Мајки сега е во среќен дом, чувството што го поттикна снимањето на видеото останува – последната прошетка на волонтерката покрај боксовите и простувањето со животните кои трпеливо го чекаат својот среќен крај.
