Светското првенство во Соединетите Американски Држави, Канада и Мексико следното лето ќе биде уникатен спортски настан, и тоа не само по рекордниот број репрезентации кои ќе се борат за титулата најдобра селекција во светот.
Освен што за првпат во историјата на Светското првенство ќе настапат 48 репрезентации, се чини дека Доналд Трамп и Џани Инфантино на едно од нивните бројни дружења во изминатите години заклучиле дека на Мундијалот му е потребна целосна „американизација“.
Така финалниот натпревар, кој ќе го гледаат милијарди луѓе ширум планетата, ќе има „half time show“ односно музичко шоу на полувремето по примерот на американскиот Супербоул, натпреварот за титулата шампион во американски фудбал во НФЛ лигата.
Веста за полувремето во стил на американскиот Супербоул беше објавена за време на ждрепката во Вашингтон, па така во традиционалната 15-минутна пауза меѓу двете полувремиња — која може да биде и подолга — ќе гледаме некои од најголемите светски ѕвезди на центарот од теренот.
ФИФА веќе го тестираше овој модел на финалето на Светското клупско првенство оваа година, кога на полувремето настапија Џеј Балвин, Доџа Кет и Колдплеј.
Се разбира, мотивот за воведување на „half time show“ е паричен, имајќи предвид дека една минута реклама за време на паузата на Супербоул чини вртоглави 15 милиони долари, а се очекува оваа бројка да биде уште поголема за Светското првенство поради значително поголемата гледаност во споредба со НФЛ.
Покрај тоа, на Светското првенство ќе биде воведена уште една практика која е карактеристична исклучиво за спортовите во САД.
Имено, играчите и тренерите ќе мора задолжително да даваат интервјуа за време на полувремето и по завршувањето на натпреварите — нешто што исто така беше тестирано на Светското клупско првенство.
