Токму оваа поделба ја искористил британскиот Канал 4 за да им приреди изненадување на гледачите кое влегло во телевизиската историја.

Телевизискиот пресврт на годината

Во рамки на специјалниот документарец насловен „Дали вештачката интелигенција ќе ми ја земе работата?“, емитуван во понеделник, 20 октомври, се истражувало како автоматизацијата го преобликува пазарот на трудот. Но, вистинскиот шок се случил на самиот крај од едночасовната програма, кога водителката, која раскажувала и известувала од различни локации, открила дека воопшто не е вистинска.

Во последните моменти од документарецот, водителката рекла: „Вештачката интелигенција ќе ги допре животите на сите во следните неколку години. А на некои ќе им ги земе работните места. Вработени во кол-центри? Агенти за корисничка поддршка? Можеби дури и ТВ водители како мене. Бидејќи јас не сум вистинска. На британската ТВ премиера, јас сум водителка генерирана од вештачка интелигенција. Некои од вас можеби погодиле: јас не постојам, не известував од локацијата. Мојата слика и глас беа генерирани од вештачка интелигенција“.

Канал 4 потврди дека со ова емитување станале првата британска телевизија која претставила водителка направена со вештачка интелигенција. Ја продуцирала компанијата Серафин Валора за „Kalel Productions“ и била создадена според упатства за постигнување реалистична изведба пред камера.

Гледачите со поделени реакции

Откритието предизвика лавина коментари на социјалните мрежи, а многумина гледачи признале дека не се посомневале. „Признавам – не сфатив дека е лажна. Ова дефинитивно покренува некои тешки прашања (што е вистинско/што не е вистинско? Што ќе прават повеќето луѓе кога ќе станат застарени?)“, напишал еден корисник на Икс.

„Само од овој клип, не би претпоставил. Ова е најдобриот аватар со вештачка интелигенција што сум го видел досега“, се согласил друг. Сепак, имало и такви со остро око. „Доста е добро, но ако погледнете внимателно ќе видите неколку проблеми“, забележал еден гледач, додека друг додал: „Да, погодив. Сцените беа премногу уредно кадрирани, нејзината дикција беше малку чудна и имаше огромна трага во нејзиното име!“.

Канал 4, исто така, издаде соопштение по емитувањето, нагласувајќи дека ова е еднократен експеримент насочен кон стимулирање на размислување и дека ова нема да стане практика.