Поради сè повисоките надворешни температури, важно е да сте свесни и за помалку познатите знаци на топлотниот удар.
Игнорирањето на здравствените совети може да предизвика топлотен удар, а во најлош случај, може да доведе до откажување на органите, па дури и до смрт.
Иако постојат некои поочигледни знаци на топлотен удар, како што се висока телесна температура (40 степени Целзиусови или повисока) и црвена, врела и сува кожа, еден помалку познат знак е „променето однесување“ кое може да се манифестира како збунетост, нејасен говор или раздразливост.
Според тоа, матичниот лекар и клинички советник во „Индепенднт фармаси“, д-р Доналд Грант, рекол дека е важно да се знае на што да се внимава, пишува британски „Мирор“.
„Симптомите на топлотен удар вклучуваат висока телесна температура, променето однесување, гадење, забрзано работење на срцето и главоболка. Избегнувањето долготрајно изложување на сонце и контролата на пиење вода се најделотворни начини за намалување на веројатноста за развој на оваа опасна состојба“, рекол тој.
Исто така, д-р Грант рекол дека нанесувањето крем за сончање и носењето соодветна облека навистина може да ви помогне да останете свежи и да избегнете прегревање кога надвор се горештини.
„Кремот за сончање е уште една задолжителна работа пред предвидениот топлотен бран, бидејќи овие производи се клучни за избегнување изгореници од сонце и топлотна исцрпеност. Покрај тоа, кремот за сончање треба да се нанесува повторно на секои два часа“, објаснил тој.
Докторот истакнал и дека носењето соодветна облека може позитивно да влијае на способноста на телото да ја регулира топлината и да одржува безбедна температура. Затоа, предлага да се одлучите за лесна, широка облека, што ја намалува веројатноста за потење и ја забавува дехидратацијата.
„Шеширот и очилата за сонце се исто така неверојатно корисни за заштита од сонце и одржување на свежина, а одржувањето на главата ладна може да помогне во заштитата од топлотен удар“, додал д-р Грант.
Покрај тоа, важно е да се избегне дехидратација, бидејќи тоа може да доведе до топлотна исцрпеност, што може да доведе до топлотен удар. Топлотната исцрпеност е поблага форма на болест поврзана со топлината, но може да напредува во топлотен удар ако не се лекува.
„Симптомите на дехидратација вклучуваат вртоглавица, зголемена жед, сува уста и темножолта урина, а може да бидат предизвикани од недостиг на вода и прекумерно потење. Затоа е толку важно да се бара сенка и да се даде приоритет на хидратацијата за да се избегне дехидратација – која може да доведе до други состојби поврзани со горештините“, рекол д-р Грант.
Ако некој покажува знаци на топлотна исцрпеност или топлотен удар, препорачливо е да се премести на ладно место за да се излади и да се поттикне внесувањето течности.
