Најновото ажурирање на апликацијата "YouTube" официјално ја прекина поддршката за неколку постари модели на "iPhone", "iPad" и "iPod Touch".
Уредите кои не можат да работат со "iOS 16" или "iPadOS 16" веќе не можат да ја инсталираат ниту користат "YouTube" апликацијата. Корисниците на овие уреди отсега ќе мораат да се потпрат на мобилната верзија преку интернет прелистувач за да пристапат до "YouTube".
Како што прв пренесе "PhoneArena", ажурирањето на верзијата 20.22.1 на "YouTube" постави нови минимални барања за оперативниот систем. Секој уред што не ги исполнува тие барања ја изгуби можноста за пристап до апликацијата.
Погодени уреди се:
• iPhone 6 s
• iPhone 6 s Plus
• iPhone 7
• iPhone 7 Plus
• iPhone SE (прва генерација)
• iPad Air 2
• iPad mini 4
• iPod touch (седма генерација)
Овие модели се ограничени на "iOS" или "iPadOS 15" и не можат да ја инсталираат ниту користат најновата верзија на "YouTube" апликацијата. Доколку користите некој од овие постари уреди, и понатаму можете да пристапите до "YouTube" преку мобилната страница: отворете "Safari" или кој било мобилен прелистувач и внесете m.youtube.com.
Иако веб-страницата овозможува пристап до содржината, искуството е ограничено – недостасуваат клучни функции на оригиналната апликација, како што се поголема флуидност при користење, репродукција во позадина и преземање видеа за офлајн гледање.
Освен ако не преминете на уред кој поддржува "iOS 16" или понов систем, ова е сега единствениот начин да гледате "YouTube" на постари "Apple" уреди.
