Во април оваа година, тој објави сеопфатен пакет „реципрочни царини“ кои ги погодија повеќето трговски партнери на САД. Додека глобалните пазари тонеа во хаос, Трамп тврдеше дека економската политика ќе го поттикне американското производство и ќе обезбеди работни места. Уследи долготрајната трговска војна меѓу Кина и САД, кои меѓусебно ги зголемуваа царините – САД воведоа царини до 145 проценти на увозот од Кина, додека Кина возврати со 125 проценти на американскиот увоз.

Многумина го обвинуваат дека се исплашил

Сепак, двете земји во меѓувреме постигнаа примирје – САД ги намалија царините за кинеските стоки, намалувајќи ги на 30 проценти. Но, потоа Трамп одеднаш повлече голем дел од тие мерки, намалувајќи ги на основните 10 проценти. Минатата недела, тој, исто така, објави планови за зголемување на царините за Европската Унија на 50 проценти, но само неколку дена подоцна ја повлече одлуката и го помести рокот за воведување царини до јули.

Инаку Трамп беше цел на критики поради овие ненадејни промени, а некои го обвинуваа дека се исплашил и затоа се откажал од своите царински планови. Ова доведе до нов прекар на Вол Стрит – „TACO“, хумористична кратенка за „Trump Always Chickens Out“. Изразот за првпат го употреби „Фајненшл тајмс“, и се употребува кога се сака да се каже дека некој не направил нешто поради страв или недостаток на храброст. Вчера новинарите го прашаа Трамп за овој прекар. „Тоа е одвратно прашање. Според мене, тоа е најодвратното прашање“, одговори тој.

Стана меме

Овој израз брзо стана вирален хит, а Доналд Трамп повторно стана мета на потсмев и мемиња на социјалните мрежи.