Невремињата што вчера ја зафатија државата предизвикаа огромна материјална штета, оставајќи стотици илјади домаќинства без електрична енергија, пренесе агенцијата "AP".

Во текот на вчерашниот ден, урагански ветрови го откорнуваа покривите од куќи, разбиваа прозорци, тргаа фасади, додека дрвја и електрични столбови беа уфрлени во улиците.

Катастрофална состојба во Сент Луис

Градоначалничката на Сент Луис, Кара Спенсер, потврди дека петмина загинале во градот, и соопшти дека над 5.000 домови се оштетени, а околу 100.000 корисници останале без струја во вечерните часови.

„Ова е навистина разорувачки“, изјави Спенсер, додавајќи дека градот е во процес на прогласување вонредна состојба и дека е воведен полициски час во најтешко погодените делови.

Повредени и болници во готовност

Бројот на повредени сè уште не е прецизиран. Болницата "Barnes-Jewish" примила од 20 до 30 пациенти, некои од нив во тешка состојба, но се очекува дека најголемиот дел ќе бидат пуштени до крајот на вечерта, изјави портпаролката Лора Хај.

Детската болница во Сент Луис примила 15 деца, од кои две ќе останат хоспитализирани до викендот.

Торнадото ја погодило и историјата

Радарите на Националната метеоролошка служба покажале дека торнадото го зафатило подрачјето на Клејтон, во близина на Сент Луис. Ударот на торнадото ја погодил и зоната на Форест Парк, каде што се наоѓа зоолошката градина на Сент Луис, како и локацијата на Светската изложба и Олимписките игри од 1904 година.

Во црквата "Centennial Christian", командантот на противпожарната единица, Вилијам Полијан, изјави дека тројца луѓе биле спасени откако дел од објектот се урнал, а едно лице загинало.

Препорака: Останете дома

Паднати дрвја и уништени семафори предизвикаа хаос во сообраќајот, а властите апелираат граѓаните да не излегуваат од дома.

Горниот кат на зградата "Harlem Taproom" е целосно уништен, но сите лица во внатрешноста се безбедни.

Портпаролката на зоолошката градина, Кристи Чајлдс, соопшти дека градината ќе биде затворена денеска поради штетата, но сите животни се на сигурно, без повреди кај персоналот, посетителите или животните.

Торнадо и во други делови на државата

Торнадото го погоди и округот Скот, каде што загинаа уште две лица, а бројни домови се уништени.

Метеоролозите предупредуваат на нови бури со можни торнада, град и урагански ветрови низ Апалачите и Средниот Запад.

Во Мерион, Илиноис, прогласена е итна тревога поради потврдено торнадо. Засега нема информации за повредени или причинета штета.

Песочна бура и топлотен бран

Во областа на Чикаго, издадено е предупредување за песочна бура, со драстично намалена видливост на повеќе од 160 километри.

Метеоролозите предвидуваат силни грмотевици и град со големина на бејзбол топче во државите Кентаки, Јужна Индијана, Јужен Илиноис, делови од Тенеси, Мисури, Арканзас и Охајо.

Тексас се соочува со топлотен бран, со температури од 35 до 40 степени Целзиусови во Сан Антонио и Остин. На југоистокот од САД, високата влажност ја влошува ситуацијата, па метеоролозите предупредуваат на опасност од дехидрација и топлотен удар, доколку не се преземат соодветни мерки.

Во меѓувреме, синоќа силни бури го погодија и Висконсин, Илиноис, северна Индијана и Мичиген, оставајќи многу подрачја без електрична енергија. Засега се прават проценки на вкупната штета.