Речиси една петтина од луѓето регрутирани од руските специјални служби за задачи во Украина се малолетници, кои биле користени за подготовка на саботажи или терористички напади, изјави за Укринформ портпаролот на Службата за безбедност на Украина (СБУ), Артем Дехтјаренко.
„Русите за своите задачи најчесто регрутираат малолетници, невработени лица и лица со разни видови зависности. Според нашата статистика, 22% од откриените сторители се малолетни, 55% се невработени, а останатите се лица со криминално досие за различни кривични дела“, рече Дехтјаренко, пренесува Укринформ.
Дехтјаренко објасни дека малолетниците се поподложни на психолошка манипулација, бидејќи младите не се во можност целосно да ги проценат последиците од своите постапки.
Портпаролот истакна дека подметнувањето пожари на возила на украинските вооружени сили и саботажите на железничката инфраструктура се интензивирале во мај 2024 година, додека масовното регрутирање деца за организирање експлозии започнало на почетокот на 2025 година.
„Од почетокот на 2025 година, руските специјални служби повторно покажаа дека немаат никакви ограничувања и префрлија на терористички напади со употреба на експлозиви.
Според Службата за безбедност на Украина, само во 2025 година, СБУ и Националната полиција откриле повеќе од 50 малолетници кои, по наредба на Руската Федерација, учествувале во терористички напади, палење автомобили и други злосторства. Портпаролот потсети на неодамнешниот случај кога Русите регрутирале двајца локални малолетници на возраст од 15 и 17 години преку Телеграм во Ивано-Франковск.
Следејќи ги руските инструкции, тие направиле импровизирани експлозиви и ги маскирале. Додека се упатувале кон одредена локација, руската специјална служба која ги следела преку ГПС, активирала експлозив во нивниот пакет, убивајќи еден од нив, а на другиот тинејџер му ги ампутирала нозете.
СБУ откри седум малолетни сторители на подметнување пожари кои дејствувале по налог на Русија во северните и централните региони на Украина. Најмладиот од осомничените имал само 12 години, додека најстариот бил 16-годишен тинејџер.
