И "OpenAI" се најде на обвинителна клупа во САД, Канада и Индија поради неовластена употреба на заштитена содржина при обучувањето на чет-ботот "ChatGPT".
Француските здруженија на издавачи и автори во средата објавија дека поднеле тужба против американскиот технолошки гигант "Мета", обвинувајќи ја компанијата за неовластена употреба на содржина заштитена со авторски права при обучувањето на нејзините системи за вештачка интелигенција.
Тужбата била поднесена во понеделник пред суд во Париз, соопштија Националното здружение на издавачи (SNE), Националниот сојуз на автори и композитори (SNAC) и Друштвото на писатели (SGDL).
Според овие организации, "Мета" ги прекршила авторските права на издавачите и авторите, обвинувајќи ја компанијата за економски „паразитизам“. Тие сметаат дека "Мета" незаконски користела содржина заштитена со авторски права за обучување на своите модели на вештачка интелигенција.
Претставниците на "Мета" не одговориле веднаш на барањето на "Reuters" за коментар во врска со тужбата.
„Сведоци сме на монументална кражба,“ изјави Маја Бенсимон, главната претставничка на "SNAC".
„Ова е борба како онаа помеѓу Давид и Голијат, но треба да послужи како пример,“ додаде генералниот директор на "SNE", Рено Лефевр.
Автори, визуелни уметници, музички издавачи и други носители на авторски права веќе имаат поднесено низа тужби против "Мета" и други технолошки компании, особено во САД, обвинувајќи ги за неовластена употреба на интелектуална сопственост за обучување на моделите на генеративна вештачка интелигенција.
Во 2023 година, актерката и писателка Сара Силверман, заедно со група автори, поднесе тужба против "Мета" во САД, тврдејќи дека компанијата ги користела нивните дела за обучување на моделот "Llama". Слична тужба во октомври минатата година поднесе и американскиот романописец Кристофер Фарнсворт.
Истовремено, и "OpenAI" се соочува со тужби во САД, Канада и Индија поради наводна неовластена употреба на заштитен материјал за обучување на "ChatGPT", напомнува "Reuters".
