Повеќе од 30 лица се повредени во несреќа на ски-лифт во североисточната шпанска скијачка област Астун, соопшти денеска регионалната влада.
Според информациите со кои располагаат властите во Арагонија, девет лица се во критична состојба, а осум се тешко повредени. Тие рекоа дека точната причина за несреќата се уште е под истрага.
„Како да се откачи кабел, скокаа столици и луѓето беа исфрлени“, изјави сведок за ТВЕ.
Ски-центарот веднаш беше затворен, а во тек се бројни спасувачки операции.
Локалните власти распоредија неколку амбулантни возила и испратија четири хеликоптери на местото на настанот за да им пружат помош на повредените, кои се транспортирани во блиските болници, јавуваат медиумите.
Ски-центарот Астун се наоѓа во планинскиот венец Пиринеи на границата со Франција.
