Дали Хамас е подготвен да го остави оружјето?
Калил ал-Хаја, еден од високите водачи на политичкото крило на Хамас, кој беше вклучен во преговорите за прекин на огнот со Израел, во интервју за Асошиетед прес во Истанбул, посочува дека Хамас може да стави крај на вооружениот отпор.
Ал Хаја рече дека Хамас ќе прифати „целосно суверена палестинска држава на Западниот Брег и Појасот Газа и враќање на палестинските бегалци во согласност со меѓународните резолуции“, долж границите на Израел од пред 1967 година. За возврат, военото крило на групата ќе се распушти.
Во преговорите, Хамас се залагаше за договор што ќе доведе до траен прекин на огнот со цел да го спречи Израел да продолжи со своите операции откако ќе бидат ослободени заложниците.
Официјалниот претставник на Хамас вели дека групата би можела да се согласи на примирје од пет или повеќе години и да го трансформира своето воено крило во политичка партија доколку се формира независна палестинска држава.
„Сите искуства на луѓето кои се бореле против окупаторите, кога ќе ги добијат своите права и својата држава, што прават? Тие се претвораат во политички партии, а нивните борбени сили се претвораат во национална армија“, вели тој.
Висока делегација на политички претставници на Хамас, предводена од шефот на политбирото Исмаил Ханије, беше во Турција минатата недела. Ханије се состана со претседателот Реџеп Таип Ердоган.
Се појавија извештаи дека раководството на Хамас во странство сака да се пресели надвор од Катар, при што Турција веќе е домаќин на голем број претставници на Хамас. Сепак, Ал-Хаја негираше трајно преместување на политичката канцеларија на Хамас и рече дека сè уште сакаат Доха да посредува во разговорите со Израел.
Во изјавата минатата недела, турскиот министер за надворешни работи Хакан Фидан рече: „Хамас е подготвен да основа палестинска држава во границите од 1967 година. Откако ќе се воспостави, движењето ќе може да се откаже од вооружената борба“.
Таквата промена на позицијата кон прифаќање на решение за две држави означува силно отстапување од принципот на терористичката група за искоренување на Израел. Сѐ уште нема реакција од Израел или од палестинската управа.
Ал-Хаја упати уште една помирлива нота, наведувајќи дека би сакал да го види Хамас да се приклучи на Палестинската ослободителна организација (ПЛО), која е предводена од ривалската фракција Фатах. Обединетата влада ќе владее со Западниот Брег и Појасот Газа. Тој додаде дека тие се против присуството на какви било странски сили, бидејќи разговорите за плановите „ден потоа“ постојано предлагаат распоредување на коалиција на регионални сили за да се обезбеди мир во Газа. Тој, исто така, имплицитно се закани на хуманитарното пристаниште во близина на брегот на Газа, кое го гради САД, а го чува Израел.
„Ние категорично отфрламе какво било непалестинско присуство во Газа, без разлика дали е на море или на копно, и ќе се справиме со секоја воена сила присутна на овие места, како окупаторска сила“, рече Ал-Хаја.
