Горан Иванишевиќ цели пет години беше дел од стручниот штаб на Новак Ѓоковиќ, но денеска пристигна официјална информација дека успешната соработка била обострано прекината пред сезоната која следи на земјена подлога.
Светскиот рекет број еден ја информираше јавнсота дека се разделил со својот тренер и со избрани зборови му се обрати на Горан, па иако и самиот нагласи дека имале подеми и падови, дефинитивно најмногу ќе се паметат успесите кои ги постигнаа заедно.
Иванишевиќ му помогна на Ноле да освои уште девет грен слем титули и директно влијаеше врз уривањето на апсолутниот рекорд, но лошиот старт на 2024-та година сепак резултираше со прекин на соработката.
Незаборавната епизода секако остава голема трага кај двете тениски легенди, а Иванишевиќ кој засега не излезе со официјално соопштение, на едноставен начин реши да му се заблагодари на Новак.
Иванишевиќ ја сподели емотивната објава на Србинот и ја збогати со два емотикони, односно срце и споени раце во знак на голема благодарност за времето кое го минаа заедно.
