Рочиштето за „Титаник 2“ го одложи судењето за „Таргет-тврдина“. По испитување на еден сведок, рочиштето не можеше да продолжи. Бидејќи ексдиректорот на УБК, Сашо Мијалков е обвинет во двата предмета, а за „Титаник 2“ денеска има јавна седница во Апелација, судијата Илија Трпков одлучи да го прекине рочиштето и додели термини за во април. Испитувањето на вториот од пет сведоци, ќе продолжи идниот месец.
Мијалков пак, кој е спроведен од затворот во Струга каде издржува затворска казна за „Империја“, со полицајците отиде во соседната зграда на Апелација. Таму ќе треба да се одржи јавна седница ЗА „Титаник 2“, предмет за изборни нерегуларности, а на која судиите ќе треба да кажат и кога точно застарува делото на ексдиректорот на УБК. Доколку седницата се одржи, веќе денеска ќе може да има одлука.
Секој ден е важен и за предметот „Таргет-тврдина“. За овој предмет чие рочиште денеска се одлижи, утврдени се два термини во април и пет термини во мај. Кривичен кажа дека судијата Илија Трпков има во план забрзано да го суди. Свесен е дека предметот е обемен, дека мора да постапи согласно насоките од Апелација која ја укина пресудата.
Ако динамиката тече исто како и претходно, а делата на обвинетите им застаруваат во 2025 година, односно за две години, тогаш пресметките покажуваат дека е невозможно да се дочека одговорност за масовното прислушување.
Застарувањето на делата за Мијалков и другите обвинети за прислушувањето ќе значи дека државата ќе треба да им плаќа отштета на сите незаконски прислушувани граѓани. Ова е трето по ред прислушување, кое е на пат да остане неказнето.
