Управата за јавни приходи (УЈП) најави засилени контроли на готовинскиот промет во пресрет на новогодишните празници, со фокус на угостителските и трговските објекти. Од институцијата информираат дека инспекциите ќе бидат интензивирани поради високото ниво на утврдени неправилности.
До крајот на ноември УЈП спровела околу 4.000 контроли, што е 2,5 пати повеќе од истиот период лани. Притоа се изречени над 2.500 глоби, а 113 даночни обврзници добиле мерка забрана за вршење дејност и запечатување на објект.
Од Управата посочуваат дека секојa четврта контрола покажува неправилности поврзани со неиздавање фискални сметки, што укажува на „широка појава на неевидентиран промет“ и практики како плаќање во готовина меѓу фирми и исплата плати „во плик“.
Покрај контролите, УЈП спровела и 3.500 советодавни посети за информирање на обврзниците за најчестите прекршувања. Чести неправилности се: фискални апарати без важечка налепница, оштетени пломби, различна регистрирана и фактичка адреса, неуплата на дневниот промет во банка и неводење книга на дневни извештаи.
Паралелните аналитички проверки укажале на ризични случаи – идентичен или необично низок дневен промет, недоследности меѓу капацитет и промет, како и разлики меѓу фискалните евиденции и ДДВ-пријавите.
До дел од казнетите обврзници УЈП испратила персонализирани известувања со повик да поднесат исправки на даночните пријави и да го платат данокот, со најави дека ќе следуваат дополнителни контроли доколку не постапат.
„Почитувањето на законот не е избор. Секоја неиздадена сметка значи пари во приватни џебови наместо во буџетот што ги финансира здравството, образованието и јавните услуги“, порача УЈП, апелирајќи граѓаните редовно да бараат фискална сметка.
Од Управата нагласуваат дека целта е намалување на даночната евазија и фер економски услови, со поддршка за чесните обврзници и санкции за оние кои го избегнуваат системот.
