Ширум Франција денеска се одржува голем меѓусиндикален штрајк, а властите очекуваат на улиците да излезат меѓу 600.000 и 900.000 луѓе.
Поради протестите, кои се организирани на 250 локации, се очекуваат значајни нарушувања во клучните сектори низ целата земја, јавува „BFMTV.com“.
Француските медиуми известуваат дека дошло до судири и на протестите во градот Нант , при што полицијата употребила солзавец. Не е познато дали има повредени. Потсетуваме, во судирите во Лион три лица беа повредени.
Префектурата на департманот Роне потврди дека во Лион повредени се новинар, демонстрант и полицаец. Според информациите на локалните медиуми, еден припадник на "CRS" бил погоден и повреден во пределот на лицето.
Околу 23 средни училишта биле целосно блокирани, а блокади биле поставени пред уште 52 училишта утрово како дел од денот на мобилизација со цел да се влијае на буџетските одлуки на новиот премиер, соопшти Министерството за образование на пладне.
Министерот за внатрешни работи на заминување, Бруно Ретаљо, претходно на прес-конференција информираше за 22 гимназии кои биле обид за блокада, од вкупно 3.700 средни училишта во Франција, што, како што рече, е многу мал процент.
„Ги поддржуваме сите демонстранти и блокади, се противиме на именувањето на Себастиен Лекорн, кој е нелегитимен премиер, и се противиме на Емануел Макрон, кој спроведува политика на фискална неправда и ја зголемува нееднаквоста“, рече Габриеле Катала, пратеничка на „LFI“, додавајќи:
„Земјата, според ’INSEE‘, не доживеала вакво високо ниво на нееднаквост уште од 1970 година. Социјалниот гнев е легитимен и сакаме тој да резултира со оставка или разрешување на Емануел Макрон. Потребни се нови избори.“
До пладне се уапсени 94 лица, меѓу кои 15 во Париз, а 32 лица сè уште се во притвор, според последните владини податоци кои ги пренесуваат француските медиуми.
Околу 15.000 луѓе учествувале на протестот во Марсеј, според податоците на локалната полиција, додека организаторите наведуваат значително поголем број, пишува „Le Figaro“.
Франција овие денови се соочува со бран на штрајкови и протести низ целата земја. Поводот е нацртот на државниот буџет за 2026 година, кој властите го претставуваат како неопходен чекор за намалување на растечкиот јавен долг, додека синдикатите и граѓаните го сметаат за хорор-шоу и удар врз социјалните права.
Според планот на владата, предвидено е значително намалување на јавните расходи, што може да ги погоди здравствениот систем, образованието и транспортот. Дополнително, реформите на пензискиот систем и можните одложувања на одењето во пензија предизвикаа дополнително незадоволство.
Синдикатите бараат поголем товар да сносат побогатите граѓани и големите корпорации и предупредуваат за сè поголема социјална нееднаквост и намалување на куповната моќ. Според нив, буџетот најмногу ги погодува оние со ниски и средни примања.
Политичкиот контекст е дополнително запалив. Новиот премиер Себастиен Лекорн ја презема функцијата во време кога кредитните агенции ја намалуваат француската оценка, а Брисел бара враќање на буџетскиот дефицит во дозволените рамки.
Во ваква атмосфера на незадоволство, синдикатите повикаа на масовни протести и штрајкови, а проценките велат дека на улиците може да излезат и до 900.000 луѓе.
